Gen 46 | WSK | STEP | Jacob ko melmasak bolala awuram ale giam ale barasam ko kariimet arungu Beersheba namaram, ale mu te ko nuet Isaac ko Kaem tama tuam.

Genesis 46

Jacob ko kuriang iton numasari ago Egypt namaman

1 Jacob ko melmasak bolala awuram ale giam ale barasam ko kariimet arungu Beersheba namaram, ale mu te ko nuet Isaac ko Kaem tama tuam. 2 Se turom Jacob aniwaram se Kaem auram ale maonam, “Jacob, Jacob,” mam. Se Jacob kuring iluwam, “Ani iweya,” mam.

3 Se Kaem balam, “Ani Kaem, nika niet ko Kaem. Egypt namarko me nguangerko. Ani nikerak Egypt namirik ale sor mu te balik se ka taleng girigir suen biya aratomonko. Asele ani aking arungak pelerik sor Canaan imi te tairikko. Se Joseph kerak baguruk se kuting awete kuarko.”

5 Se Jacob Beersheba beteram. Ko kuriang alo nu patawu Pharaoh karis beteram se ago taiman mu te beteman, ale nunga imet kuriang ago nunga gi awete nunga awuman. 6 Ale nononga bulmakau sipsip mel, se nunga melmasak suen biya Canaan giman mu suen la ago Egypt namaman. 7 Jacob ko kuriang iton, se ko numasari, imet, kari, mu suen la nunga giam arungu Egypt namaman. ^{▼▼Gen 46:7,27 Nuna Egypt namaman: Acts 7:14-15.}

8 Imi Jacob ko kuriang imas arungu Egypt namaram wore nunga nunup:

Ko kuriang laun mu Reuben.9 Se Reuben ko kuriang kari mu Hanoch, Pallu, Hezron, se Carmi. 10 Se Simeon ko kuriang kari mu Jemuel, Jamin, Ohad, Jakin, Zohar, se Shaul. Shaul mu Canaan imet ko kuriang.

11 Se Levi ko kuriang kari mu Gershon, Kohath, se Merari.

12 Se Judah ko kuriang kari mu Er, Onan, Shelah, Perez, se Zerah. (Bare ilagala, Er, Onan, mu Canaan kua gilingiman, se arungu Egypt me namaman.)

Se Perez ko kuriang kari mu Hezron, se Hamul.
13 Se Issachar ko kuriang kari mu Tola, Puah, Jashub, se Shimron.

14 Se Zebulun ko kuriang kari mu Sered, Elon, se Jahleel.

15 Reuben, Simeon, Levi, Judah, Issachar, Zebulun, mu Jacob ko nuwus laun Leah ko kuriang. Tom Jacob Mesopotamia baga se Leah kuriang mu nunga iluwam. Nu kuriang imet suwanta ago iluwam, ko nup Dinah. Se Jacob Leah nunga kuriang numasari nunguning mu nononga tom 33.

16 Se Gad ko kuriang kari mu Zephon, Haggi, Shuni, Ezbon, Eri, Arodi, se Areli.

17 Se Asher ko kuriang kari mu Imnah, Ishvah, Ishvi, se Beriah, se nunga nogoras imet mu Serah. Se Beriah ko kuriang kari mu Heber se Malkiel.

18 Se Jacob ko kuriang 16 imi Zilpah kumik te arataman. Zilpah mu ura saonga imet Laban ko nanawus Leah tuam wore.

19 Se Jacob ko nuwus Rachel ko kuriang mu Joseph se Benjamin. 20 Joseph Egypt sor te imet Asenath tam. Se ko kuriang ilagala, Manasseh, Ephraim. Asenath mu Potiphera, On wonong ko priest bo, wore ko nanawus.

21 Se Benjamin ko kuriang kari mu Bela, Beker, Ashbel, Gera, Naaman, Ehi, Rosh, Muppim, Huppim, se Ard. 22 Se kuriang imas ari 14 imi Jacob ko nuwus uria Rachel kumik te arataman.

23 Se Dan ko kuriang kari suwanta, Hushim.

24 Se Naphtali ko kuriang kari mu Jahziel, Guni, Jezer, se Shillem.

25 Se Jacob ko kuriang numasari 7 imi ko nuwus Bilhah kumik te arataman. Bilhah mu ura saonga imet Laban ko nanawus Rachel tuam wore.

26 Jacob ko kuriang se ko numasari nunguning Egypt namaman mu nunga tom 66. Bare Jacob ko kuriang nunga imet mu me ago nunga kauman. 27 Se Joseph ko nuwus mu kuriang kari ilagala Egypt sor te nunga iluwam. Se Jacob ko kuriang numasari ago nama Egypt arataman mu nunga tom mu 70 diram.

Jacob ko kuriang numasari ago Egypt bagakaso

28 Jacob Judah maonam, namuruk Joseph manuk se taiwa sor Goshen mu te nuet arigokko mam. Se namaram maonam. Se tom nuna nama Goshen arataman, 29 mu Joseph ko karis te aragam ale ko nuet arigokko namaram. Nu tai ko nuet kote aratam, ale iluwam yasaram, ale ilak nia lagakaso. 30 Se Jacob Joseph maonam, “Ani am kuerikko,” mam. “Ani ni karkem, ni me kuerem, marak am bagasam!”

31 Se Joseph ko launuria se ko nuet ko imet kari suen la ago nunga maonam, “Ani namirik Pharaoh iwita manikko, ‘Aga launuria se aga ait ko imikiri ago Canaan animan mu tai arataman,’ ma balik, 32 ale iwita manikko, ‘Kari ari mu nuna sipsip bulmakau nunga bitarmonko kari, ale nunga sipsip bulmakau se nunga mel suen biya giman karogo taiman.’ 33 Se Pharaoh nina anape ura tasan mu ko ninga isok, 34 mu nina iwita maonalko, ‘Anananga nainet alo bitakasan iwitatala, ana gotektek la bulmakau sipsip nunga bitarman tai laga aitak ana kari aman.’ Nina uwuta balal mu asele nu baluk se nina sor Goshen mu te daigal bagaralko.” Joseph uwuta balam, mu awuk, Egypt alo bulmakau sipsip bitua kari nunga me kuakasan, ale nongorak bagomonko me kuakasan.